<<
http://www.abdn.ac.uk/elphinstone/kist/mclips/track21.mp3 >>
AVE ATQUE VALE
by Ken Morrice
Grumphy and pernickity wis Beezer Broon
Oor Form Maister. For three lang eers
He sought tae ding Latin
Intae oor wanwordy lugs.
My pal McNab wis nae muckle eese
At the leid. Ae day he heided his hamewirk
'Latin Exercise'. Beezer grumphed
And jist stroked oot the 'Latin.'
Syne McNab decided tae tak up widwirk.
Fan at last we quat Beezer's Form,
I wis tasked wi gaitherin siller
For a Class present as 'a token
Of our esteem and gratitude'.
I delegated McNab fa bocht, at lang
Last, a cassette o Cornkisters.
Cam the occasion, he gied ower the kistie
And nae blate cried oot 'Ave Beezer,
Te salutamus. Or, in my ain leid,
We're aa awa tae bide awa!'
<<
http://www.abdn.ac.uk/elphinstone/kist/mclips/track02.mp3 >>
EUROPEAN SCOTS
by Sheena Blackhall
Pict, Celt an nesty Norseman,
My, fitiver wid fowk say,
If they kent that they're still bidin
Here in Aiberdeen the day!
Aber's Pict fur river mooth
Roman Deva's Dee,
The Frenchmen gied us 'Bon Accord'
Corbie an pertrick tee!
Should ye gae up tae Hazleheid
O golf tae play a roon
As ye hunker in a bunker
Yer a Flemish kinno loon.
Takk a daunder up Deeside awhile
Tae loch an glen an Ben
Admirin strath an burnie
Thon's some Celtic wirds ye ken!
At the skweel ye meet the dominie
A Latin kind o mannie
An if yer gweed an tidy,
Ye'll be likit bi the jannie.
Watch oot fur the Scandinavians,
Vikings at the Brig o Dee!
They'll burn yer kirk aroon yer lugs
Withoot ae wird o lee.
European Aiberdonians
Skinnie dippin on the san
At nicht pairty wi the Germans
We're a mixed linguistic lan!